-->
U3F1ZWV6ZTM5NjAxOTExNzI1X0FjdGl2YXRpb240NDg2MzUwMjA3OTY=
recent
أخبار ساخنة

حصريا الكشف المبكر عن سرطان الثدي

حصريا الكشف المبكر عن سرطان الثدي

حصريا الكشف المبكر عن سرطان الثدي


ما فيش حاجه في الدنيا ترعب اي واحده ست و تطير النوم من عينيها؛ زي لفظ سرطان الثدي. لأسباب كتيره مش وقتها دلوقت.
اللي عايز اركز عليه هو، الكشف المبكر لهذا المرض اللعين.

فيه ٣ محاور فقط للكشف المبكر:

١- تاريخ العيله
 ٢- الفحص الذاتي
٣- ماموجرام Mammogram.

اولا: تاريخ العيله:

يعني بنساءل عن وجود هذا المرض في أفراد العائله سواء من الدرجه الأولي أو الدرجه الثانيه . الدرجه الأولي  يبقي الام و الأخوات. الدرجه التانيه يبقي الخاله و العمه و بناتهم. 
هل حد في العيله عنده أو اتشخص سابقا بسرطان الثدي؟
و بتحديد درجه القرابه بيتحدد درجه الخطوره. يعني لو الست الوالده توفت بهذا المرض؛ يبقي نسبه المرض عندك عاليه. لو الست الوالده اتشخست بهذا المرض و اخواتك البنات الاتنين اللي أكبر منك اتشخصوا بهذا المرض؛ يبقي احتمال انه يحدث معاكي، نسبه عاليه قوي، نقول ٨٠ أو ٩٠%.
لو المرض متركز في عيله معينه، و معظم السيدات في هذه العيله جالهم هذا المرض، يبقي فيه احتمال أن عندهم جين معين اسمه BRACA جين، الذي يسبب سرطان الثدي و القولون.

ثانيا: الفحص الذاتي:


وهو في غايه الاهميه القصوي، لأنك انتي فقط صديقه صدرك، لأنه لازق فيكي. مش معقول هتروحي لدكتور عشان يفحص صدرك كل شهر، لكن ممكن جدا انك تفحصي نفسك كل شهر أو حتي كل يوم لو تحبي و ما فيش اي تكاليف.
 الفحص ده ليه نظام، يعني اقسمي كل صدر الي ٤ تربع، و افحصي ب صوابع ايديكي فقط، مش ب الكف، و تحريك صوابعك بطريقه دائريه في كل ربع من الصدر، و بعدين تنقلي علي الربع اللي بعده. مره في الشهر تبقي كافيه.

لو حسيتي بأي جزئيه أو "كلكوعه" يبقي لازم تستشيري الدكتور علي طول. ليه علي طول؟ لأن التأخير في التشخيص في منتهي الخطوره علي حياتك. خلينا نقول ان كل اسبوعين تأخير في تشخيص لهذا المرض ممكن يكلفك ٤ سنين من حياتك!. فنتتأخريش!!

ثالثا: الماموجرام:

 و ده فحص بالاشعه في جهاز مخصوص لفحص الثدي. الستات وصفوه كانك حطيتي صدرك و قفلتي عليه باب التلاجه اللي عندك في البيت. بس مهم جدا. لو انتي فوق ٤٥ سنه؛ يبقي لازم يتعمليه كل ١-٢ سنين. لو عندك حد في العيله عنده المرض ده؛ يبقي تبتدي من سن ٣٥ أو حتي ٣٠ سنه و نعمله كل ٦ شهور. و هكذا.

 لو الاشعه أظهرت اي ورم، يبقي الخطوه اللي بعد كده أننا ناخذ عينه بابره صغيره أو خلال فتح بسيط.
و ما زال الفحص الذاتي المنتظم و المستمر بدون خمول أو تخاذل، هو اهم خطوه. ربنا يحافظ عليكم جميعا.

المصدر
د/صبري عوض
استاذ مساعد كليه الطب جامعه ادمنتون، كندا



ليست هناك تعليقات
إرسال تعليق

إرسال تعليق

الاسمبريد إلكترونيرسالة